வியட்நாமில் சாவகச்சேரியை சேர்ந்தவர் உயிரிழப்பு

 

கனடாவிற்கு சட்டவிரோதமாக படகு மூலம் செல்ல முயற்சித்த போது, படகு பழுதடைந்த நிலையில் வியட்நாமில் தங்கவைக்கப்பட்டிருந்தவர்களில் ஒருவர் உயிரிழந்துள்ளதாக வௌிவிவகார அமைச்சு தெரிவித்துள்ளது.

வியட்நாமிலுள்ள வைத்தியசாலையில் அனுமதிக்கப்பட்டிருந்த நிலையில், அவர் உயிரிழந்துள்ளதாக வௌிவிவகார அமைச்சு உறுதி செய்துள்ளது.

வியட்நாம் முகாமில் தடுத்து வைக்கப்பட்டுள்ளவர்களில் இருவர், தங்களை நாட்டிற்கு திருப்பி அனுப்ப வேண்டாம் என தெரிவித்து கடந்த 18 ஆம் திகதி தற்கொலைக்கு முயற்சித்துள்ளனர். குறித்த இருவரும் வியட்நாமிலுள்ள வைத்தியசாலையில் அனுமதிக்கப்பட்டிருந்த நிலையில், ஒருவர் குணமடைந்துள்ளார்.

தீவிர சிகிச்சைப்பிரிவில் அனுமதிக்கப்பட்டிருந்த 37 வயதான ஒருவர் நேற்று (23) அதிகாலை உயிரிழந்துள்ளார். இவர் யாழ்ப்பாணம் – சாவகச்சேரி, கல்வயல் பகுதியை சேர்ந்த 37 வயதான நபர் என தெரியவந்துள்ளது.

மூன்று பிள்ளைகளின் தந்தையான சுந்தரலிங்கம் கிரிதரன் என்பவரே உயிரிழந்துள்ளதாக அவரின் உறவினர்கள் உறுதிப்படுத்தினர்.

உயிரிழந்தவரின் சடலத்தை நாட்டிற்கு கொண்டு வருவதற்கான உதவிகளை மேற்கொள்ளுமாறு சுந்தரலிங்கம் கிரிதரனின் உறவினர்கள் கோரிக்கை விடுத்துள்ளனர்.

எவ்வாறாயினும், மரணத்திற்கான காரணம் தொடர்பான விசாரணைகள் நிறைவு செய்யப்பட்டதன் பின்னரே அடுத்த கட்ட நடவடிக்கைகள் முன்னெடுக்கப்படும் என வௌிவிவகார அமைச்சு அறிவித்துள்ளது.

சட்டவிரோதமாக படகு மூலம் கனடா செல்ல முயற்சித்த போது, படகு பழுதடைந்த நிலையில் கடந்த 08 ஆம் திகதி 303 அகதிகளும் வியட்நாமிற்கு அழைத்துச்செல்லப்பட்டனர்.

வியட்நாமிலுள்ள மூன்று முகாம்களில் இவர்கள் தடுத்து வைக்கப்பட்டுள்ளமை குறிப்பிடத்தக்கது.